مبدأ عمل مقطع الجهد المستمر : Buck -Boost Converter




ما هو مقطع الجهد المستمر Buck -Boost Converter؟

هو عبارة عن محول تيار مستمر يعني ب أختصار بيحول الجهد والتيار المستمر من سوية على سوية أعلى أو أخفض حسب الحاجة , يعني اذا فرضنا عنا توتر بطارية 9 فولت ونحنا بحاجة ل 12 ف فينا نستخدم هاد المحول منعطيه 9 وبيعطيني 12 لذلك هو هام جدا في جميع التطبيقات الكهربائية .

كيف يعمل ؟

حسب مو واضح ب الدارة فأن الجهد Vi هو جهد الدخل يعني الجهد الي عم اعطيه ل الدارة و Vo هو الجهد الي بحصل عليه,

مبدأ العمل ب بساطة , لما بغلق المفتاح s بيمر التيار من المنبع الى الملف ف بيخزن داخل الملف طاقة أما الديود ف كونه طبقنا على مهبطه جهد موجب بيفتح وبيقطع الدارة , يعني لما بسكر المفتاح s عمليا بيصير ب الدارة بس المنبع و الملف , هلئ لما بفتح المفتاح S ياترى شو بيصير ؟ أول شي المنبع بيطلع برات الدارة بيصير ماله علاقة بشي , والطاقة الي تخرنت داخل الملف بيفرغها ب المقاومة والمكثف على الشكل التالي

طيب يا ترى المكثف شو شغلته ؟ المكثف بيشحن لما الملف بيفرغ , يعني لما بفتح المفتاح وبيبلش الملف يفرغ ف التيار بيروح عل المقاومة وعل المكثف سوا , ولمممما بغلق المفتاح s مرة تانية مشان يشحن الملف , ف الطاقة الي تخرنت داخل المكثف من شوي بيفرغها ب الحمل يعني ب المقاومة وهيك الحمل عل الحالتين عم ياخد تيار يا من الملف يا من المكثف ف بالتالي منحصل على خرج ثابت .

هلئ ايمت بيرفع الجهد وايمت بيخفضه ؟

لما زمن أغلاق المفتاح بيكون أكبر من زمن فتحه , يعني لنفرض الدور 1 ثانية , ف اذا اغلت المفتاح 0.6  ثانية وفتحته 0.4 ثانية , ف هون الطاقة الي تخزت ب الملف كبيرة وبالتالي جهد الخرج بيكون أكبر من جهد الدخل , اذا العكس يعني شغلنا مثلا مثلا 0.3 ثانية وفتحناه 0.7 ثانية ف هون الطاقة المخزنة ب الملف قليلة و بالتالي جهد الخرج بيكون أقل من جهد الدخل ..